Tjetër hap për shoqërinë shtetërore të sigurisë “Illyrian Guard”-Si do të llogariten tarifat për ofrimin e shërbimeve
‘Illyrian Guard’ është një shoqëri shtetërore e cila parashikohet t’i ofrojë shërbimin e sigurisë subjekteve publike, në fushën e rendit, teknologjisë së informacionit, si dhe çdo shërbimi tjetër në përputhje me qëllimin e krijimit dhe statutin e saj.
Pas tenderit për blerjen e uniformave në Fletoren Zyrtare janë publikuar edhe mënyra sesi do të përcaktohen tarifat me të cilat kjo shoqëri në varësi të Ministrisë së Brendshme do të ofrojë shërbimet .
Tarifat me të cilat do të ofrohet shërbimi i sigurisë do të përcaktohet në bazë të klasifikimit të objekteve në kategorinë 1 dhe kategorinë 2, duke i vlerësuar sipas:
-rëndësisë së objektit;
-ndërtimit arkitekturor të objektit
-vendndodhjes së objektit (vlerësimi ambientit/mjedisit)
– largësisë së objektit nga vendndodhja e sh.a. “Illyrian Guard”
-infrastrukturës së mjedisit;
– aktivitetit që zhvillohet në objekt
-historiku i ngjarjeve kriminale në objekt dhe në zonë
-pasojave që vijnë nga dhunimi dhe cenimi i objektit
-sipërfaqes/madhësisë së territorit dhe numrit të objekteve që ndodhen brenda saj
-aftësisë dhe shpejtësisë së reagimit të grupit të gatshëm;
Mënyra e llogaritjes së kostos financiare vjetore për ruajtjen dhe sigurimin e objektit sipas kategorive gjithashtu bazohet në elementët e shërbimit dhe shpenzimeve të çdo elementi.
Këto kategori ndahen në ‘Personeli dhe shpenzimet e tij’ ku përfshijnë përgjegjësin e objektit me vlerë vjetore rreth 1.1 milion lekë dhe monitorues objektesh, 5 (pesë) punonjës, me kosto financiare vjetore në vlerën e rreth 4.2 milion lekëve.
Gjithashtu në këtë kategori përfshihet edhe grupi i gatshëm me 10 (dhjetë) punonjës me vlerën rreth 8.5 milionë lekë , vlerë e shtuar në tarifë janë edhe shpenzimet për uniformë të cilat shkojnë rreth 460 mijë lekë.
Kategori tjetër është ajo e pajisjeve të shërbimit e cila përfshin sistemin e kamerave të vëzhgimit, sistemin e alarmit, sistemin e kontrollit elektronik, motoçikleta, radio, internet dhe karburant të cilat kapin vlerën vjetore në total rreth 1.6 milion lekë.
Përfshihen gjithashtu shpenzimet administrative jo të drejtpërdrejta me kosto financiare vjetore në vlerën e rreth 4 milion lekëve, bazuar në peshën rreth 20% që zënë këto shpenzime ndaj shpenzimeve direkte.
Nebi Xhomaqi / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.