“Tkurren” pronarët e lojërave të fatit – INSTAT: Në 2017, tre herë më pak se në 2013

Në Shqipëri ka vetëm 204 kompani që ushtrojnë aktivitetin e tyre në lojëra fati dhe baste. Të paktën sipas të dhënave më të fundit të Institutit të Statistikave që i referohen vitit 2017. Por, kjo shifër ka qenë tre herë më e lartë në 2013. Madje, ndër vite numri i këtyre kompanive është në rënie. Ndërkohë që në 2017 ishin 204 kompani në këtë sektor, në 2016 ishin 282, në 2015, 440, 2014-ën, 624,  dhe në 2013, 649.

Pra tendenca është e qartë dhe e ndjeshme. Por, aktiviteti i lojërave të fatit dhe basteve në vendin tonë nuk ka rënë aspak gjatë viteve të fundit, ai është rritur vazhdimisht. Nga një hulumtim i hollësishëm i tregut por edhe nga perceptimi i përgjithshëm vihet re, se kjo tendencë është rrjedhojë e përqëndrimit të këtyre bizneseve në më pak duar.

Pra, me kalimin e viteve, sidomos gjatë 5 viteve të fundit, kompani të ndryshme që operojnë në këtë sektor janë bashkuar në një NIPT të vetëm. Kjo ka bërë që, në letra, numri i këtyre kompanive të bjerë ndjeshëm. Nëse tendenca do të vijojë të jetë e njëjtë edhe përgjatë viteve në vijim, atëherë, përqëndrimi në pak duar i këtij lloj biznesi do të bëhet edhe më i theksuar.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.