Tkurren shërbimet postare – AKEP: Në periudhën tetor-dhjetor 2020, 19% më pak shërbime se 3-mujori i 2019-ës

Shërbimet postare u tkurrën me 19% gjatë 3-mujorit të fundit të vitit 2020, në raport me të njëjtën periudhë të një viti më parë. Sipas të dhënave të raportura nga Autoriteti i Komunikimeve Elektorinike e Postare, gjatë periudhës tetor-dhjetor 2020 rezultojnë 6,848,803 objekte postare të pranuara dhe të dërguara nga Posta Shqiptare dhe Ofruesit e Shërbimeve Postare, ndërkohë që pjesën më të madhe e zë Shërbimi Universal Postar, i cili luhatet në nivelet rreth 73%.

Sa i takon ndarjes së tregut, për tremujorin e katërt të vitit 2020 Posta Shqiptare zë rreth 77% të tregut postar përkundrejt Ofruesve të tjerë të shërbimeve postare të cilët së bashku zënë rreth 23%. Në total, janë 26 ofrues priavtë të këtij shërbimi, që gjithsesi mbeten jodominantë në raport me Postën Shqiptare. Ndërkaq, sa i takon shërbimit ekspres, gjatë tremujorit të katërt të vitit 2020 ka pasur rritje të shërbimeve, krahasuar me të njëjtën periudhë të nje viti më parë.

Gjithashtu, për shërbimin ekspres vërehet një rënie e pjesëve të tregut për Postën Shqiptare, ku nga rreth 21% të tregut për këtë tregues në tremujorin e katërt të vitit 2019, pjesa e tregut të Postës Shqiptare në tremujorin e katërt të vitit 2020 ka arritur në rreth 11%, përkundrejt rreth 89% të ofruesve të tjerë. Ndërkaq, sa i takon 3-mujorit të fundit të 2020-ës në raport me 3-mujorine tretë, sipas AKEP, vërehet një rritje e numrit të shërbimeve postare në masën 9,038 shërbime.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.