Tkurren suficitet e Gjermanisë – Tregtia neto bie për 2017-ën për të parën herë në 8 vite
Suficiti tregtar në Gjermani ra gjatë vitit të kaluar për të parën herë që prej 2009-ës, duke treguar se kërkesa e fortë e brendshme po tërheq më shumë importe dhe po ribalancon ekonominë e orientuar nga eksportet.
Kancelarja Angela Merkel ka marrë kritika nga administrata e Donald Trump për suficitin e madh tregtar të vendit me Shtetet e Bashkuara.
Kreu i Fondit Monetar Ndërkombëtar, Christine Lagarde i ka bërë gjithashtu thirrje Gjermanisë që të rrisë shpenzimet brenda vendit dhe të nxisë importet, duke paralajmëruar se akumulimi i suficiteve të mëdha të llogarisë korrente në vende si gjermania, janë pjesërisht shkak i rritjes së proteksionizmit në vende të tjera.
Në vitin 2017, suficiti tregtar i Gjermanisë ra në 244.9 miliardë euro, nga niveli rekord i lartë prej 248.9 miliardë që arriti një vit më parë, tregojnë të dhënat e Zyrës Federale të Statistikave. Kjo ishte rënia e parë që prej vitit 2009.
Suficiti i llogarisë korrente, që përfshin fluksin e mallrave, shërbimeve dhe investimeve, ra në 257.1 miliardë euro, nga 259.3 miliardë që ishte në 2016-ën. Vetëm për muajin Dhjetor, eksportet e përshtatura ndaj efekteve sezonalë, u rritën me 0.3%, ndërsa importet me 1.4%.
Suficiti për Dhjetorin u tkurr në 21.4 miliardë euro, poshtë projeksioneve për 21.7 miliardë. Sipas analistëve, euro e fortë po jep gjithashtu ndikim. Qeveria gjermane pret që rimëkëmbja e nxitur nga konsumi të vazhdojë këtë vit, duke projektuar një rritje me 2.4% të ekonomisë për vitin 2018.
Për të fituar mandatin e saj të katërt, Angela Merkel i dha social demokratëve kontrollin e ministrisë së Financave, apo mundësinë për të shpenzuar nga suficiti rekord në buxhet, duke nxitur kështu kërkesën e brendshme dhe tkurrur më tej tregtinë neto.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.