“Tkurret” biznesi i huaj – Pakësohen ndërmarrjet e mëdha dhe ato nga vendet e BE-së
Numri i bizneseve të huaja në Shqipëri ra lehtë vitin e kaluar. Sipas të dhënave nga Instituti i Statistikave, numri i ndërmarrjeve me pjesëmarrjen e kapitalit të huaj arriti në rreth 6259, në rënie me 0.6% krahasuar me një vit më parë.
Në total, kjo rënie ishte më e kufizuar krahasuar me pakësimin e përgjithshëm të ndërmarrjeve private jo-bujqësore në Shqipëri, që për vitin 2018 ishte 3.2%. Por, ajo që bie më shumë në sy është rënia drastike e numrit të bizneseve të huaja të përmasave të mesme dhe të mëdha.
Kështu, numri i ndërmarrjeve të huaja me mbi 50 të punësuar ra me 22%, ndërsa numri i ndërmarrjeve me 10 deri në 49 të punësuar ra me 17%. Rreth 79% e ndërmarrjeve të huaja kanë përmasa të vogla, me më pak se katër individë të punësuar, peshë kjo në rritje të konsiderueshme krahasuar me vitin 2017.
Për sa i takon origjinës së kapitalit, ndërmarrjet e investitorëve nga Bashkimi Europian vazhdojnë të dominojnë, me 64% të totalit, por pesha e tyre ka rënë me rreth 3 pikë përqindje. Vitin e kaluar numri i ndërmarrjeve me aksionerë nga vendet e BE-së u pakësua me më shumë se 100 njësi, ndërsa u shtuan 200 biznese që i takojnë aksionerëve jashtë BE-së.
Sipas shteteve, struktura e ndërmarrjeve të huaja në ekonominë shqiptare dominohet nga sipërmarrja italiane. Për vitin 2018, ndërmarrjet me pjesëmarrjen e aksionerëve italianë ishin përbënin rreth 46% të totalit. Italia ka një diferencë të thellë në raport me sipërmarrjet e vendeve të tjera, ku e dyta vjen Greqia e Kosova me rreth 7% dhe Turqia me 6% të numrit të përgjithshëm të ndërmarrjeve. me 8%, e më tej Kosova dhe Turqia me afërsisht 7%.
Aktiviteti i bizneseve të huaja sipas sektorëve është i ngjashëm me strukturën e përgjithshme të sipërmarrjes në Shqipëri dhe shumica janë të angazhuara në sektorët e shërbimeve. Rreth 76% e bizneseve të huaja punojnë në shërbime, ndërsa ato ndërmarrje që punojnë në prodhim kryesisht janë të angazhuara në industri dhe në ndërtim.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.