Tkurret eksporti i fruta-perimeve – Perimet e ngrira dhe agrumet, rënien më të lartë

Në gjysmën e parë të vitit, nga gjithë harta e produkteve bujqësore që eksportohen jashtë vendit, zëri i bujqësisë ka shënuar rënie, ndërsa blegtoria, agroindustria dhe peshkimi kanë pasur ecuri pozitive.

Megjithëse rënia duket se është e lehtë me vetëm 1.9 për qind, konkretisht nga 6,5 miliardë lekë eksporte në 6.4 miliardë, janë disa produkte që kanë pësuar tkurrje në eksport, si pasojë ndoshta e kërkesës në rënie apo prodhimit më të ulët.

Duket se një sërë produktesh për të cilat vitet e fundit kërkesa ka qenë në rritje, këtë vit ka pasur reduktim të shitjeve.  Konkretisht rënie kanë pasur produkte ë ndryshme si domate, qepë, hudhra, karrota, rrepa, zarzavate të tjera, agrumet, si dhe një pjesë e konsiderueshme e frutave.

Por duket se tkurrja më e madhe e eksporteve është vënë re te perimet e ngrira me -86.4%, agrumet -66.7 %,  njëkohësisht rënie të lartë kanë edhe frutat e thara si dhe bimët si xenxerfil, trumzë apo shafran. Në total eksportet bujqësore për 6-mujorin e parë të vitit janë rritur me rreth 2 miliardë lekë, duke u regjistruar në 16.3 miliardë lekë.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.