Tkurret konsumi në Gjermani – Bien shitjet me pakicë gjatë muajit Janar
Shitjet me pakicë në Gjermani ranë në mënyrë të papritur gjatë muajit të parë të vitit tregojnë të dhënat e fundit, duke sinjalizuar se, konsumi privat mund të mbetet i dobët gjatë gjysmës së parë të këtij viti. Kjo performancë vjen pasi ky indikator dështoi që të jepte një kontribut pozitiv në rritjen e ekonomisë më të madhe të Europës gjatë tremujorit të fundit të vitit të kaluar.
Indikatori i luhatshëm që është shpeshherë edhe subjekt rishikimesh tregoi se, shitjet me pakicë gjatë Janarit ranë me 0.7%. Të dhënat rezultojnë gjithashtu nën pritshmëritë e tregjeve dhe analistëve. Konsumi privat ka qenë lokomotiva e ekonomisë gjermane gjatë viteve të fundit duke i zënë kështu vendin tregtisë së jashtme.
Kjo, pasi konsumatorët filluan të përfitojnë nga tregu i fortë i punës, pra papunësia në minimum dhe pagat e larta, si dhe nga normat mjaft të ulta të interesit. Por të dhënat më të fundit tregojnë se, eksportet i kanë zënë sërish vendin. Gjatë tremujorit të fundit të 2017-ës, ekonomia gjermane u rrit në terma tremujorësh me 0.6%.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.