Tkurrja monetare në botë – JPMorgan: Shumica e vendeve në zhvillim do rrisin interesat këtë vit
Banka amerikane e investimeve JPMorgan, parashikon se ky vit do të sjellë rritjen e normave të interesit nga vendet në zhvillim në nivelin më të lartë që përpara se të ndodhte kriza financiare.
Sipas bankës amerikane, 19 nga 25 ekonomi në zhvillim ka gjasa të rrisin kostot e huamarrjes. Vetëm Malajsia do t’i mbajë të pandryshuara, ndërsa Nigeria, India, Kina dhe Turqia pritet t’i ulin. Lista nuk ishte e gjatë dhe nuk përfshiu vende si Argjentina, që ka dyfishuar normat e interesit në 60% vitin e kaluar, për shkak të kolapsit të valutës. JPMorgan bëri të ditur se pret që ritmi i rritjes së interesave mund të jetë më i ngadaltë nëse Rezerva Federale në Shtetet e Bashkuara, ngadalëson ciklin e tkurrjes monetare.
Mes viteve 2015 dhe 2018, vendet në zhvillim, nga Brazili de Rusia e deri te Armenia, ulën interesat duke i çuar kostot e huamarrjes në rënie. Megjithatë, duke nisur nga Shkurti 2018, rritja e fortë e dollarit dhe interesave në Shtetet e Bashkuara goditën valutat e tregjeve në zhvillim, veçanërisht në Argjentinë dhe Turqi, duke bërë që shumë banka qendrore të kësaj kategorie të rrisnin normat e interesit.
Sipas bankës amerikane, norma mesatare e interesit në tregjet në zhvillim do të rritet në 5% këtë vit, nga 4.7%. Megjithatë, banka pret që obligacionet në valutë lokale të tregjeve në zhvillim të kenë performancë më të mirë se ç’kanë pasur vitin e kaluar, pavarësisht këtyre lëvizjeve. JPMorgan pret që obligacionet t’i shpërblejnë investitorët me një normë prej 6%, që është ekuivalente me humbjen e vitit të kaluar.
Banka pret gjithashtu që borxhi i tregjeve në zhvillim i denominuar në dollar, të shtojë 2.2%, krahasuar me 4.3% që humbi në 2018-ën.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.