Tkurrja monetare në SHBA – Tregjet do të monitorojnë qasjen që do të ndjekë kryetari i ri i FED
Kryetari i ri i Rezervës Federale, Jerome Powell, pritet të lajmërojë rritjen e normës bazë të interesit këtë javë, që do të jetë lëvizja e tij e parë në krye të sistemit bankar qendror në SHBA.
Vëmendja e tregjeve do të jetë te komentet e tij, për të vlerësuar nëse optimizmi që ai ka për ekonominë amerikane do të sjellë një cikël më të shpejtë të tkurrjes monetare. Megjithatë, ai ka thënë hapur se mbështet rritjen graduale të normave të interesit, duke ndjekur qasjen e ish-kryetares, Janet Yellen.
Një nga çështjet kryesore të kryetarit të ri do të jetë ruajtja e rimëkëmbjes ekonomike të Shteteve të Bashkuara.
Megjithatë, shenjat e fuqizimit të potencialit ekonomik, nënkuptojnë se tkurrja e politikave do të zgjasë dhe normat e interesit do të jenë më të larta se sa pritej më parë.
Pasiguria për drejtimin e Rezervës Federale u vu në dukje gjatë muajit Shkurt, kur tregjet e kapitalit pësuan rënie gjigante pas dëshmisë së parë në Kongres të Powell.
Rezerva Federale pritet të rrisë normën bazë të interesit në segmentin 1.5-1.75% në fund të takmit dy-ditor të Mërkurën si dhe të japë projeksionet e reja për ekonominë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.