Tokio shënon rekord të rasteve me Covid-19 – Qyteti mikpritës i Lojërave Olimpike ka mungesë të shtretërve në spitale
Qyteti mikpritës i lojërave olimpike, Tokio, ka regjistruar numrin më të lartë të rasteve që kur nisi pandemia, në 2,848, ndërkohë që autoritetet po i kërkojnë spitaleve që të përgatisin më shumë shtretër për pacientët, ndërkohë që varianti Delta është bërë mbizotërues. Rritja e infeksioneve kërcënon më tej mbështetjen për kryeministrin Yoshihide Suga, vlerësimi për të cilin ka rënë në nivelin më të ulët që kur mori detyrën, kryesisht prej reagimit ndaj pandemisë.
Kjo përbën gjithashtu sfida për lojërat olimpike, ndërkohë që shumë japonezë shqetësohen se hyrja e atletëve dhe zyrtarëve të eventit mund të përkeqësojë situatën. Rreth 31% e të anketuarve nga e përditshmja Nikkei thanë se lojërat duhet të anulohen apo shtyhen përsëri. Analistët thonë se është e pamundur të llogaritet në mënyrë sasiore se sa kanë ndikuar lojërat olimpike tek rritja e infeksioneve, por që janë nxitësi kryesor.
Japonia ka shmangur deri më tani vatrat shkatërruese që kanë përjetuar vende të tjera si India, Indonezia dhe Shtetet e Bashkuara, por vala e pestë e pandemisë e nxitur nga varianti Delta, po shton presionet tek spitalet në Tokjo. Deri në nisje të javës, vetëm 20% e pacientëve prej 12,635 në kryeqytet kanë patur mundësinë të marrin trajtim në spital, sipas të dhënave qeveritare. Në pritje të rritjes së rasteve dhe vështirësive në sistemin shëndetësor, Tokjo ka deklaruar gjendjen e katërt të emergjencës shtetërore këtë muaj, që do vazhdojë deri pas lojërave Olimpike.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.