Toyota zgjerohet në Kinë – Rrit kapacitetin e prodhimit me 240,000 automjete në vit
Kompania japoneze Toyota do të rrisë kapacitetin e prodhimit në fabrikën e saj në qytetin e Guangzhout në Kinë, përveç rritjes së prodhimit me 120 mijë njësi në fabrikën tjetër në qytetin e Tianjin.
Një person i afërt me kompaninë deklaroi se Toyota do të rrisë kapacitetin në qendrën e prodhimit në qytetin jugor të Guangzhout po me 120 mijë automjete në vit, ose me 24%. Në këtë mënyrë, Toyota do të rrisë kapacitetin në total me 240,000 automjete në vit, ose me 20%.
Kapaciteti i prodhimit të Toyota në Kinë është 1.16 milionë makina në vit.
Reuters raportoi më herët se Toyota planifikon të ndërtojë kapacitete shtesë në Tianjin për të prodhuar rreth 10,000 autyomjete elektrike dhe 110,000 automjete hibride gjatë këtij viti. Ndërkohë, qeveria kineze ka deklaruar se do të heqë kufirin e pronësisë së huaj për kompanitë që prodhojnë makina hibride ose elektrike, gjatë këtij viti, për ta liberalizuar plotësisht deri në vitin 2022.
Gjithashtu, Pekini zyrtar po mbështet prodhimin dhe shitjen e automjeteve elektrike brenda vendit, duke ofruar subvencione. Gjithsesi, Toyota nuk ka bërë të ditur ndonjë shifër, se sa do të jetë investimi në fabrikën e Guangzhout, ndërsa zgjerimi në Tianjin do të kushtojë 257 milionë dollarë.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.