Trajtimi i çështjeve në gjykata, Meta: Problem ngarkesa dhe respektimi i afateve të gjykimit. Çështjet që duhen zgjidhur sa më parë
Presidenti i Republikës, Ilir Meta i pranishëm në Konferencën “Efikasiteti i procedurave gjyqësore në Gjykatat Administrative të Shqipërisë dhe efektet e Reformës në Drejtësi” deklaroi se gjatë vitit 2016 në disa raste fryma e ligjit në respektimin e afateve për gjykimin e disa çështje është përmbysur, madje sipas tij ka pasur ngarkesë në gjykim dhe në shqyrtimin e çështjeve në Gjykatën e Apelit Administrativ.
“Në 2016 fryma e ligjit në disa raste është përmbysur. Respektimi i afateve të gjykimit ka rezultuar një problem shqetësues, pasi vihet re se disa gjykata tejkalojnë afatet ligjore për shqyrtimin e çështjeve. Ka pasur ngarkesë për gjykimin dhe shqyrtimin e çështjeve në Gjykatën e Apelit Administrativ. Problem mbetet situata edhe në Gjykatën e Lartë, ku ngarkesa është rritur ndjeshëm edhe për shkak se trupa gjyqësore e kësaj gjykate është pakësuar, këtë e vuan edhe trupa e kolegjit administrativ”, tha Meta.
Kreu i shtetit u ndal gjithashtu edhe tek konflikti gjyqësor administrativ, ku sipas tij ka njohur rritje kohët e fundit.
“Konflikti gjyqësor administrativ ka njohur rritje këto vite, duke e vendosur gjykatën në pozitë të vështirë në përballimin e ankimeve dhe rrjedhimisht edhe në pozicion sfidues për të zbatuar afatet ligjore. Kjo situatë ku numri çështjeve administrative rritet, ku shoqëria jone nuk arrin t’i zgjidhë këto çështje, është Gjykata Administrative ajo që duhet të zgjidhë konfliktin dhe mbingarkesën. Duhen trajtuar sa më shpejt çështje si largimi nga puna e nëpunësve civile, trajtimi i ankimeve mbi pensionet, apo kundërshtimet e gjobave ndaj biznesit. Këto janë çështje tepër sensitive që prekin ekonominë familjare dhe financat, ndaj duhet të jenë në fokusin e gjyqësorit, por edhe të administratës”, theksoi Meta.
os.de/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.