Trajtimi me radioterapi për pacientët me kancer – Brenda vitit shtohet një makineri tjetër në QSUT

Agjencia Ndërkombëtare e Energjisë Atomike (IAEA) do të ndihmojë Shqipërinë të rrisë kapacitetet për trajtimin me radioterapi për pacientët me kancer. Njoftimin e ka bërë vetë ky institucion, përpara takimit vjetor që zhvillohet në Austri në datat 19 dhe 20 Shtator.

Brenda këtij viti, IAEA do të asistojë Shqipërinë me instalimin e një makinerie linac në Qendrën Spitalore Universitare “Nënë Tereza”. Suporti i agjencisë përfshin edhe kalibrimin e makinerisë, në mënyrë që pacientët të marrin dozat e përcaktuara.

Makineritë e terapisë me radiatim janë një pjesë thelbësore e trajtimit efektiv të kancerit, por ato kanë një kosto të lartë për t’u blerë dhe mirëmbajtur. Me shtimin e këtij akseleratori linear (linac), numri i pajisjeve në të gjithë vendin do të arrijë në 6.

Shqipëria aktualisht zotëron një makineri teleterapie cobalt-6 dhe një linac në departamentin e radioterapisë në QSUT, një linac në departamentin e neurokirurgjisë po në këtë spital, si edhe dy linac në spitale private.

Sipas të dhënave të Ministrisë së Shëndetësisë, kanceri është shkaku i dytë kryesor i vdekjeve me 16.6%, pas sëmundjeve kardiovaskulare. Çdo vit raportohen rreth 7140 raste të reja me kancer, nga të cilët 3900 kanë nevojë për radioterapi si pjesë e trajtimit të tyre.

Pas instalimit të makinerisë së radioterapisë, asistenca e IAEA vijon me trajnimin e stafit për specifikat e makinerisë nga prodhuesi, mbështet mjekët profesionistë përmes praktikave në vende që kanë pajisje të tilla në operim, si edhe dërgon ekspertë për të verifikuar efektshmërinë dhe sigurinë e makinerisë.

Akseleratori i parë linear u instalua në QSUT shkurtin e kaluar, falë investimit prej 315 milionë lekësh të qeverisë austriake.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.