Traktati i Ahenit, “ringjallja” e BE – Merkel dhe Macron nënshkruajnë paktin e bashkëpunimit mes 2 vendeve

Presidenti francez, Emmanuel Macron dhe kancelarja gjermane Angela Merkel, nënshkruan këtë javë një traktat të ri të miqësisë, që është projektuar për të fuqizuar marrëdhëniet franko-gjermane dhe përmirësuar jetesën e qytetarëve në të dy vendet.  Traktati u nënshkrua në Ahen, ndërkohë që  Franca dhe Gjermania pritën 56 vjetorin e Traktatit të Elysee-së.

Megjithatë, kjo nuk përbën gjë të re. Parisi, në veçanti, ka sugjeruar prej kohësh rinovimin e traktatit në dekadat kur u nënshkrua, pavarësisht faktit se janë shtuar amendime ndër vite.    “Traktati i Ahenit do të jetë themeli i bashkëpunimit mes vendeve tona”, tha Merkel përpara se ta nënshkruante paktin e ri. “74 vite pas fundit të luftës së Dytë Botërore, ajo që është e dukshme, po vihet në dyshim përsëri.   Për rrjedhojë, kërkohet një angazhim i ri i përgjegjësive tona brenda Bashkimit Europian, një përgjegjësi që mbahet nga Gjermania dhe Franca.” Presidenti francez, Emmanuel Macron kritikoi ata që përhapën gënjeshtra mbi traktatin dhe theksoi rëndësinë e bashkëpunimit franko-gjerman.

“Ata që harrojnë vlerën e bashkëpunimit franko-gjerman, e bëjnë veten fajtore të krimeve të së kaluarës.  Ata që përhapin gënjeshtra po dëmtojnë njerëzit që pretendojnë të mbrojnë, duke kërkuar përsëritjen e historisë.” 

Traktati fillestar daton që prej fillimit të viteve 60’,  apo 18 vite pas luftës së  Dytë Botërore.  Më 22 Janar 1964, presidenti francez Charles de Gaulle dhe kancelari gjerman Konrad Adenaure nënshkruan traktatin e Elysee-s, që vulosi pajtimin mes 2 vendeve.

Në deklaratën e re të përbashkët, Merkel dhe Macron kanë trajtuar iniciativa në fusha të ndryshe të politikave. Pakti i rinovuar përfshin plane për të zgjeruar programet e shkëmbimit të qytetarëve dhe fuqizuar bashkëpunimin në politikat Europiane, të jashtme dhe të sigurisë.

Pakti premton gjithashtu integrim më të fortë ekonomik, që përfshin politika të koordinuara të mjedisit dhe klimës. Traktati i ri fokusohet edhe në bashkëpunimin në mbrojtje të të dy vendeve dhe luftën kundër terrorizmit.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.