Transferimi apo ndryshimi i numrit të aksioneve, si do të veprojnë Shoqëritë Aksionare? Publikohet udhëzimi i ri i MZHETTS
Shoqëritë aksionare, të cilat rezultojnë të regjistruara në regjistrin tregtar, në rastet e ndryshimeve në lidhje me transferimin e aksioneve, kapitalin e regjistruar, numrin e aksioneve dhe/ose vlerën nominale të secilit aksion, kanë detyrimin e pasqyrimit të këtyre ndryshimeve në shoqërinë Qendra e Regjistrimit të Aksioneve sh.a., Tiranë. Kështu, thuhet në udhëzimin e fundit të MZHETTS për regjistrimin e titujve në shoqërinë “Qendra e Regjistrimit të Aksioneve” sh.a., Tiranë.
“Titull”, sipas formës juridike, janë ato të përcaktuara në nenin 3 të ligjit nr. 9879, datë 21.2.2008, “Për titujt”, ndërkohë që detyrimi për regjistrimin e titujve (aksioneve) në shoqërinë Qendra e Regjistrimit të Aksioneve sh.a., Tiranë, rrjedh nga pika 5 e nenit 119 të ligjit nr. 9901, datë 14.4.2008, “Për tregtarët dhe shoqëritë tregtare”, i ndryshuar. Për zbatimin e këtij udhëzimi ngarkohet shoqëria Qendra e Regjistrimit të Aksioneve sh.a., Tiranë dhe Shoqëritë aksionare të regjistruara në Regjistrin Tregtar”, thuhet në udhëzim.
Udhëzimi i MZHETTS, i miratua në mbështetje të nenit 102, pika 4, të Kushtetutës së Republikës së Shqipërisë, të nenit 119, pika 5, të ligjit nr. 9901, datë 14.4.2008, “Për tregtarët dhe shoqëritë tregtare”, të neneve 6 e 13 të ligjit nr. 9879, datë 21.2.2008, “Për titujt”, hyn në fuqi me botimin në Fletoren Zyrtare.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.