Transformimi i 9-katësheve – Veliaj: Projekti do të krijojë më shumë hapësira biznesi dhe vende pune
Zona e 9-katësheve do të shndërrohet së shpejti në një hapësirë biznesi duke gjeneruar kështu mjaft vende të reja pune. Deklarata ka ardhur nga krybashkiaku i Tiranës, Erion Veliaj, i cili ka njoftuar edhe projektin e ri transformues që do të lidhë sheshin ‘Skënderbej’ me ‘Pazarin e Ri’, gjatë dëgjesës publike me banorët e njësisë Nr.8 për buxhetin 2019.
Sipas tij, hapësirat për biznese do të krijohen si rrjedhojë e mbylljes së kazinove, një vendim i marrë së fundmi nga qeveria shqiptare.
“Kemi marrë një vendim që të mos i lëmë Pazarin e Ri dhe sheshin “Skënderbej” si dy ishuj veç e veç, me kolonat në mes, por kemi përgatitur një investim së bashku me miqtë tanë të Fondit Shqiptaro-Amerikan, për të riparuar të gjithë pjesën e 9-katësheve, kolonave, që sheshi “Skënderbej” të lidhet natyrshëm, me të njëjtin cilësi punimesh, përmes dy pjesëve të kolonave, me Pazarin e Ri, duke e kthyer në një rrugë të madhe shopingu. Me lirimin e shumë pikave të kazinove dhe basteve, do të ketë më shumë hapësirë për biznese të mirëfillta, që gjenerojnë vende pune”, tha Veliaj.
Duke u ndalur te investimet e kryera në këtë Njësi Administrative, Veliaj vuri theksin te rehabilitimi i zonës së Bregut të Lumit, ku sipas tij për herë të parë nuk ka pasur përmbytje. Ndërkohë, më tej u ndal edhe te projektet e reja që do të zbatohen në këtë zonë, konkretisht te ndërtimi i një shkolle të re si dhe rehabilitimi i një blloku të tërë banimi.
“Ndërkohë, jemi në proces realizimi për ndërtimin e një shkolle të re, rehabilitimin tërësor të një blloku banimi, korsitë e reja të biçikletave. Rr. “Qemal Stafa”, do të përfshihet nga aksioni për rivitalizimin e kësaj zone, që është realisht zemra e Tiranës, ndërkohë kemi projektuar rikonstruksionin e 4 rrugëve të Njësisë Administrative 8”, deklaroi Veliaj.
Ndërkohë, ka përshëndetur vendimin e qeverisë për ndalimin e lojërave të fatit, duke e cilësuar këtë si vendimin më të mirë për qytetarët e Tiranës.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.