Transformimi i rolit të BQE. Lagarde dëgjon shoqërinë civile për gabimet e bëra nga institucioni

Presidentja e Bankës Qendrore Europiane, Christine Lagarde, nisi një tur të “këshillave” publike, duke angazhuar shoqërinë civile për të parën herë, ndërkohë që synon të ndryshojë strategjinë e bankës dhe ta bëjë më fleksibël ndaj sfidave sociale.  Në rishikimin e parë të strategjisë së bankës në 17 vite, institucioni në Frankfurt po përpiqet të ripërcaktojë objektivin e inflacionit.  Ndër detyra të tjera mund të shtohen lufta me ndryshimin klimatik, përfshirja shoqërore dhe fuqizimi i rolit të grave.  Ky angazhim bën kontrast me traditat e institucionit teknokrat, që është fokusuar kryesisht tek bankat dhe tregjet financiarë, duke shpenzuar shumë pak kohë me njerëzit e përgjithshëm.

“Euro është valuta e përbashkët e të gjithë qytetarëve të Eurozonës, është një e mirë e përbashkët dhe ne jemi kujdestarët e saj. Banka Qendrore Europiane ndodhet në shërbim të qytetarëve”,- tha Lagarde.   Në një event ku organizatat jo-qeveritare folën në mënyrë direkte me Lagarde dhe ekonomistin e institucionit Philip Lane, kritikat më të mëdha u përqendruan tek përdorimi i mjeteve të bankës që kanë sjellë përfitime për të pasurit dhe kanë arritur në mënyrë të ngadaltë ekonominë reale.

Duke blerë triliona euro borxh, institucioni synon të nxisë ekonominë e Eurozonës, nëpërmjet uljes së kostove të huamarrjes, një strategji që sipas kritikëve kërkon shumë kohë që të arrijë personat apo entet në nevojë.  Shumë organizata jo-qeveritare kritikuan bankën për mos përfshirjen në ndryshimin klimatik, ndërkohë që blerjet e titujve të borxhit janë në përfitim të disa prej ndotësve më të mëdhenj në continent.  Banka Qendrore Europiane i blen titujt në parimin e neutralitetit të tregut.  Megjithatë, tregjet nuk kanë përfshirë rrezikun klimatik dhe mbikanalizojnë kapital tek ndotësit më të mëdhenj, e për rrjedhojë, neutraliteti është në përfitim të ndotësve

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.