Transparenca në zgjedhje, Zguri: Duhet përmirësim rrënjësor i kuadrit ligjorë për financimet
Reformës zgjedhore në vendin tonë po i kushtohet një rëndësi e veçantë pasi vetëm në këtë mënyrë do të ketë garantim të zgjedhjeve të lira dhe të ndershme.
Ndër vite në proceset zgjedhore në vendin tonë nuk ka patur transparencë të plotë sa i përket financimit të partive që kanë marrë pjesë në zgjedhje. Këtë problematik e risolli në vëmendje edhe një herë OSBE/ODIHR në raportin përfundimtar për zgjedhjet e qershorit të 2017.
Në workshop-in e organizuar nga Bashkimi Evropian dhe Këshilli i Evropës me temë “Struktura e mbikëqyrjes së financave të fushatave zgjedhore dhe partive politike”, kreu i KQZ është shprehur se po punohet për rekomandimet e bëra.
“Vetëm para pak ditësh u njohëm me raportin përfundimtar të Asamblesë Parlamentare të Këshillit të Evropës dhe atë të OSBE/ODIHR. Ato përmbajnë rekomandime edhe për financimin e partive politike. Rekomandimet për financimin e partive politike dhe fushatave zgjedhore i adresohen legjislatorit dhe KQZ-së. Sa i përket KQZ-së, unë ju siguroj se institucioni që drejtoj, rekomandimet e këtyre dy organizmave i ka pjesë të axhendës së punës tij”.
Gjatë fjalës së tij Zguri ka bërë thirrje partive politike që të bëjnë përmirësimin rrënjësor të kuadrit ligjor për financimet.
“Tani “muratorët” e reformës nuk mund ta konsiderojnë përmirësimin rrënjësor të kuadrit ligjor për financimin çështje të dorës së dytë. Tani është koha që lidershipi politik të tregojë shtetari dhe ta deklarojë reformën e financimit dhe transparencën e fondeve e të shpenzimeve çështje prioritare.”
Workshopi zhvillohet në kuadër të projektit që KQZ, me mbështetjen e BE dhe KiE po zhvillon për rritjen e kapaciteteve të strukturës që do të mbikëqyrë financimin e partive politike.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.