Transparencë për cilësinë e karburanteve – Regjistër publik për numrin e oktanëve, plumbin, squfurin. Do publikohet çdo vit
Të dhënat e cilësisë së lëndëve djegëse që përdoren në territorin shqiptar do të mblidhen në një regjistër të posaçëm, i cili çdo vit do t’i dërgohet Agjencisë Kombëtare të Mjedisit, e cila do të ketë detyrimin t’i publikojë në faqen e vet zyrtare për të bërë të mundur që ato të jenë të aksesueshme nga qytetarët. Një udhëzim i përbashkët lëshuar nga Ministria e Infrastrukturës dhe Energjisë dhe Ministria e Turizmit dhe Mjedisit, ngarkon Inspektoratin Shtetëror Teknik me zbardhjen e analizave të mostrave të subjekteve të sektorit të hidrokarbureve dhe publikimin e tyre në faqen e Agjencisë Kombëtare të Mjedisit.
Në udhëzim përcaktohet se Inspektorati Shtetëror Teknik dhe Industrial raporton çdo vit brenda datës 28 shkurt të dhënat e grumbulluara mbi sasinë dhe cilësinë e lëndëve djegëse për vitin paraardhës, në përputhje me formatet e raportimit të përcaktuara në kreun III, të këtij udhëzimi, pranë Agjencisë Kombëtare të Mjedisit. Të dhënat mbi sasitë do të jenë sipas informacioneve të dërguara nga shoqëritë tregtare dhe Drejtoria e Përgjithshme e Doganave. Agjencia Kombëtare e Mjedisit ruan dhe administron informacionin e marrë nga Inspektorati Shtetëror Teknik dhe Industrial dhe krijon bazën e të dhënave në lidhje me cilësinë e benzinës, diezelit, lëndë djegëse të lëngëta të rënda (heavy fuel oil), lëndë djegëse të lëngëta të mesme të rënda (gas oil), dhe lëndëve djegëse të lëngëta marinë (marine fuel).
Në tabelat e të dhënave do pasqyrohen elementë si Numri i kërkuar i oktanit, Presioni avullit, Distilimi: Përqindje e avulluar në 100˚C
– Përqindje e avulluar në 150˚C; Analiza e hidrokarbureve: – Olefinat – Aromatikët – Benzene, përmbajtja e squfurit dhe e plumbit, si dhe elementë të tjerë teknikë.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.