Transporti ajror – Dy milionë udhëtarë për tetë muaj
Rritja rekord e numrit të turistëve gjatë sezonit veror i ka dhënë një shtysë të mëtejshme edhe tregut të transportit ajror të pasagjerëve. Sipas të dhënave nga Instituti i Statistikave, numri i pasagjerëve arriti në 376 mijë, me një rritje 15% krahasuar me një vit më parë. Për tetë muajt e parë të vitit, nga Aeroporti i Tiranës kanë udhëtuar afro dy milionë pasagjerë me një rritje prej 14% ndaj të njëjtës periudhë të një viti më parë.
Të dhënat e Instat treguan se për tetë muajt e parë të këtij viti, Shqipërinë e vizituan 4.4 milionë shtetas të huaj, në rritje me 117% krahasuar me të njëjtën periudhë të një viti më parë. Ndërsa daljet e shqiptarëve jashtë vendit arritën në 3.6 milionë, në rritje me 3% krahasuar me të njëjtën periudhë të një viti më parë. Tregu i transportit ajror të pasagjerëve po rritet për të shtatin vit radhazi dhe potencialet janë ende të mëdha. Ndërkohë që pritet hyrja në treg operatorit Air Albania, ende duket larg nisja e flurimeve nga aeroporte të tjerë veç atij të Tiranës.
Aeroporit i Kukësit pritet të jepet me koncesion te dy operatorë privatë, megjithatë, gara ende nuk është hapur zyrtarisht. Ndërkohë, që nga fillimi i vitit qeveria po negocion me disa kompani turke për ndërtimin e një aeroporti në Vlorë, por deri tani nuk ka asnjë informacion lidhur me ecurinë e diskutimeve. Ndërkohë, kompania që menaxhon Aeroportin e Tiranës po realizon fitime gjithnjë e më të larta. Vitin e kaluar, TIA arriti një fitim neto prej rreth 18 milionë eurosh.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.