Transporti ajror – Mbi 2.2 milionë pasagjerë për 8-mujorin 2019

Sezoni turistik i dha një shtysë të mëtejshme rritjes së tregut të transportit ajror të pasagjerëve. Sipas të dhënave nga Instituti i Statistikave, në tetë muaj numri i udhëtarëve nga Aeroporti Ndërkombëtar i Tiranës ishte më shumë se 2.2 milionë. Krahasuar me 8-mujorin e vitit të kaluar, numri i pasagjerëve është rritur me 11.5%. Vetëm për gushtin, nga aeroporti i vetëm ndërkombëtar i vendit kaluan 425 mijë udhëtarë. Shifrat e deritanishme tregojnë se tregu i transportit ajror po rritet për të tetin vit radhazi.

Në aeroportin e Tiranës veprojnë aktualisht 21 kompani ajrore, që për tetë muajt e parë të këtij viti kryen mbi 19 mijë fluturime. Megjithatë, potencialet e rritjes së tregut janë edhe më të mëdha, por çmimet e larta të biletave nuk lejojnë shfrytëzimin e plotë të këtyre potencialeve. Për shkak të çmimeve më të ulëta, shumë shqiptarë zgjedhin aeroportet e Malit të Zi dhe Maqedonisë së Veriut për të fluturuar drejt Europës. Përpjekjet për të mundësuar nisjen e fluturimeve nga aeroporte të tjera deri tani nuk kanë dhënë rezultate të prekshme.

Qeveria dha me koncesion aeroportin e Kukësit, por do të duhen rreth dy vjet derisa ai të jetë gati për operim. Këtë muaj kryeministri prezantoi një projekt për ngritjen e aeroportit të Vlorës, por qeveria ende nuk i ka idetë e qarta kush do ta ndërtojë dhe, aq më pak akoma, kur do të ndërtohet.

Ndërkohë, këtë vit po vërehet edhe një përmirësim i lehtë në tregun e transportit detar të udhëtarëve. Për 8-mujorin e parë 2019, numri i pasagjerëve në transportin detar arriti në 1.16 milionë, në rritje me 3% krahasuar me një vit më parë.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.