Transporti ajror i pasagjerëve rritet me 1/4 – 2 milionë njerëz fluturuan deri në fund të Shtatorit. Shumë mirë dhe transporti detar
Momenti shumë i mirë i transportit ajror të pasagjerëve ka vijuar edhe përgjatë muajit Shtator, kur mbi 267 mijë pasagjerë zgjodhën të fluturojnë. Shifra përbën një rritje me 24.4% krahasuar me të njëjtin muaj një vit më parë, ndërsa tashmë edhe rritja për 9-mujorin e 2017-ës arriti në 24.6%.
Në total janë rreth 2 milionë pasagjerë nga muaji Janar në muajin Shtator, një rritje me gati 400 mijë pasagjerë më tepër.
Fakti që numri i fluturimeve u rrit me 12.5% në Shtator, do të thotë se edhe linjat ajrore kanë dalë më të fituara, duke ngritur mesataren e pasagjerëve për çdo udhëtim. Aeroporti “Nënë Tereza” priti gjatë këtij muaji 2390 fluturime, ose 266 fluturime më tepër se një vit më parë.
Shtimi i kompanive ajrore që operojnë në vendin tonë ka qenë një tjetër faktor që ka ndikuar në rritjen e shpejtë të këtij sektori të transportit përgjatë këtij viti. Për shtatori, ishin aktive në vend 10 linja ajrore, 5 më shumë se një vit më parë.
Megjithatë, drejtuesi kryesor i rritjes ka qenë shtimi i turistëve të huaj jo nga rajoni që vizitojnë Shqipërinë.
Këtë muaj, rritje domethënëse ka regjistruar edhe transporti i pasagjerëve në rrugë detare. Këto vizita, të lidhura kryesisht me Italinë, janë rritur me 21.3% krahasuar me Shtatorin e kaluar, ndërsa për nëntë muajt e parë të vitit, janë rreth 210 mijë pasagjerë më tepër.
Nga ana tjetër, transporti hekurudhor i pasagjerëve vijon krizën duke regjistruar rënie më të thella muaj pas muaji. Edhe në Shtator individët që udhëtuan me tren u ulën ranë me 14.1%, dhe ishin vetëm 3,487 pasagjerë.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.