Transporti konfirmon “boom-in” e tregtisë së jashtme – Në nëntor rritet me 32% volumi i transportit të mallrave nëpër porte
Edhe të dhënat e transportit për muajin nëntor konfirmojnë momentin e mirë që po kalon tregtia e jashtme, pas krizës së rëndë të shkaktuar nga pandemia. Kështu, volumi i mallrave të ngarkuara/shkarkuara në porte, në muajin Nëntor 2020 është 426 mijë ton, duke u rritur 32% krahasuar me Nëntorin e një viti më parë. Në 11-mujorin e këtij viti ndërkohë, volumi i mallrave të ngarkuara/shkarkuara në porte është 3.9 milionë ton, duke u ulur me 4,4%, krahasuar me të njëjtën periudhë të një viti më parë.
Këto të dhëna vijnë vetëm pak ditë pas atyre të tregtisë së jashtme, që flisnin për një kthesë, si në import ashtu edhe në eksport, gjatë nëntorit, me rritje dyshifrore krahasuar me vitin e kaluar. Sa i përket eksportit të mallrave, rritje gjatë nëntorit njohin si ato të transportuara nëpërmjet detit, nëpërmjet ajrit dhe nëpërmjet rrugëve tokësore, me këto të fundit që regjistrojnë rritjen më të madhe, në rreth 13% në vlerë, tregojnë shifrat e Instat. Sa i përket importeve ndërkohë, deti dhe rruga regjistrohen në rritje, ndërkohë që ka rënë ndjeshëm transporti ajror i mallrave. Edhe për importet, transporti rrugor, regjistron rritjen më të madhe në vlerë.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.