Transporti ndërkombëtar i pasagjerëve dhe i mallrave – DPT: Ja si do të funksionojë TVSH-ja për këto shërbime
Sipas informacionit të publikuar në faqen zyrtare të Drejtorisë së Përgjithshme të Tatimeve transporti ndërkombëtar i pasagjerëve nga Republika e Shqipërisë me destinacion vendet jashtë kufirit, është një furnizim shërbimi me shkallë zero të TVSH-së. Transporti ndërkombëtar i pasagjerëve përfshin: a) Transportin ajror ose detar të pasagjerëve që kanë si destinacion një vend jashtë Shqipërisë; b) Transportin rrugor të pasagjerëve që kanë si destinacion një vend jashtë Shqipërisë, shkruhet në njoftim.
Ndërmjetësit e biletave (agjencitë) të transportit ndërkombëtar dhe shërbime për transportin ndërkombëtar të pasagjerëve
Sipas DPT agjencitë e biletave të transportit ndërkombëtar të pasagjerëve, të cilët janë në cilësinë e ndërmjetësve transparentë dhe veprojnë në emër dhe për llogari të një personi tjetër, ofrojnë shërbimin si agjent për biletat e udhëtimit për transportin ndërkombëtar të pasagjerëve, duke e tatuar me shkallën 0 % të TVSH-së.
Transporti ndërkombëtar i mallrave
Ndërkaq sa i përket DPT bën me dije se vendi i furnizimit të shërbimit të transportit të mallrave nga një person i tatueshëm për një person të tatueshëm, është në vendin e marrësit të shërbimit. Ja cilat janë 3 rastet e mundshme:
- Në rastin kur marrësi i shërbimit të transportit ndërkombëtar të mallrave është një person i tatueshëm në Shqipëri, vendi i furnizimit të shërbimit të transportit është në Shqipëri. 2 Kujdes! Në këtë rast, ky shërbim është i tatueshëm me TVSH në Shqipëri, pavarësisht destinacionit të mallrave
- Nëse personi i tatueshëm marrës i shërbimit të transportit të mallrave me destinacion jashtë Shqipërisë është një person i tatueshëm jashtë Shqipërisë, atëherë vendi i tatimit është në vendin e marrësit dhe për këtë nuk tatohet në Shqipëri.
- Në rastin kur transporti ndërkombëtar i mallrave është një proces i vazhdueshëm përfshirë eksportin e mallrave që transportohen deri në dorëzimin e tyre në destinacionin që ndodhet jashtë territorit shqiptar, atëherë pavarësisht vendit ku fillon transporti i mallrave, ky shërbim transporti konsiderohet shërbim i lidhur drejtpërdrejtë me eksportin e mallrave dhe zbatohet shkalla e TVSH-së 0%. Për këtë transportuesi duhet të vërtetojë që ka kryer shërbimin e transportit ndërkombëtar deri ne destinacionin jashtë Shqipërisë, të mallrave për të cilat vërteton se është kryer procedura e eksportit, nëpërmjet deklaratës së eksportit.
Sipas DPT në rastin kur malli i transportuar nuk ka shkuar ne destinacion jashtë Shqipërisë, shërbimi i transportit është i tatueshëm me 20%. Për arsye të thjeshtimit të procedurës, ndërmarrjet që kryejnë transport ndërkombëtar, por që për arsye procedure nuk mund të sigurojnë dokumentacionin e kërkuar për të provuar transportin ndërkombëtar, aplikojnë TVSH 20% për shërbimin dhe klienti ka të drejtë të aplikojë zbritjen e TVSH-së në përputhje me aktivitetin që kryen, theksohet në informacionin e publikuar nga DPT. Për informacionin e plotë klikoni këtu!
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.