Transporti urban, në krizë – Përgjysmohen autobusët në shërbim, Unioni: Nuk përballojmë dot kostot e pandemisë dhe naftës
Prej datës 18 tetor, transporti urban në Tiranë, Vorë dhe Kamëz do të operojë me gjysmën e kapacitetit të flotës së mjeteve. Përmes një njoftimi për media, Unioni i Transportit Publik bëri me dije se ky vendim vjen si pasojë e situatës të pafuqishme ekonomike për të përballuar ecurinë e transportit dhe sidomos pas rritjes së vazhdueshme e të pandërprerë të çmimit të naftës dhe të largimit të stafit.
Po ashtu, Unioni thekson se pas një viti e gjysëm nga rihapja e transportit publik, ndodhen në pikën fillestare, ku asnjë nga institucionet përgjegjëse nuk ka marrë asnjë masë apo plotësim të kërkesave ekonomike të premtuara. “Jemi në këtë situatë pas shumë kërkesash dhe njoftimesh si në institucionet vendore dhe ato qendrore ku mos reagimi i tyre na bën që të shkojmë deri në një kapitullim ekonomik të këtij sektori”,-thuhet ndër të tjera në njoftim. Sektori i transportit publik ishte një nga më të goditurit nga pandemia e shkaktuar nga COVID-19.
Pas bllokimit, qeveria vendosi që funksionimi i transportit publik në vend nisi në datën 15 qershor, ndërkohë që në bazë të protokolleve të miratuar nga Ministria e Shëndetësisë parashikohet ushtrimi i aktivitetit me 70% të kapacitetit, si dhe mbajtja e detyrueshme e maskave nga ana e punonjësve dhe pasagjerëve.
Ndërkohë, pas rihapjes operatorët e transportit kërkuan ndërmarrjen e një sërë masash lehtësuese, si një formë për shpëtimin e tyre nga falimenti, duke përfshirë heqjen e akcizës së naftës, uljen e TVSH-së nga 20 në 6% si dhe faljen e taksave lokale. Pas protestave të organizuara vitin e kaluar u bë me dije se do të njiheshin si shpenzime të zbritshme në masën 100% konsumi i naftës dhe heqja e taksave dhe tarifave vendore, por kjo paketë u cilësua në atë kohë nga operatorët e këtij tregu si e pamjaftueshme për të kapërcyer krizën.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.