“Trashëgimia kulturore”, Rama: BE, 12 miliardë euro në Ballkan dhe Turqi. Investimet në këtë fushë nxisin rritjen ekonomike
“Është domosdoshmëri për të vazhduar më tej me investimet në monumente dhe sigurisht të ndryshojmë mentalitetin e qytetarëve që investimet në kulturë i shohin si “lusk” dhe që sipas tyre nuk përkojnë me rritjen ekonomike dhe të mirëqenies”.
Kështu është shprehur Kryeministri Edi Rama, gjatë një vizite në “Parkun e Rilindur të Apolonisë”, ku ndër të tjera ai shtoi se Masterplani i përgatitur për Apoloninë është i plotë dhe duhet çuar drejt zbatimit përfundimtar.
“ Masterplani i përgatitur për Apoloninë është i plotë dhe nuk na mbetet gjë tjetër veç se ta çojmë drejt zbatimit përfundimtar, duke e dikur se ka ende elemente për ndërhyrje. Ndërtimi i këtij materpalni do të jetë një shtysë e rëndësishme, për rritjen e kapaciteteve njerëzore në funksion të mbrojtjes së trashëgimisë kulturore, në funksion të një rilindje të plotë të kësaj fushe, ku në 20 vite u bënë shumë dëme. Është domosdoshmëri për të vazhduar edhe me tej, për të ndryshuar mentalitetin e atyre që investimet në kulturë i shohin si “luks” që sipas tyre nuk përkojnë me rritjen ekonomike dhe të mirëqenies. Çdo monument kulture i restauruar është rritje ekonomike, është rritje e mirëqenies. I gjithë rrjeti i monumenteve të kulturës është shumë i pasur, është një rrjet më vete për të fuqizuar ekonominë dhe për të rritur mirëqenien, dhe si pasojë të rrisim punësimin. Turizmi është një motor i zhvillimit ekonomik dhe nuk është vetëm deti dhe mali që nxisin zhvillimin, por edhe trashëgimia kulturore. Rritja e numrit të personave që vizitojnë monumentet do të thotë rritje e konsumit, rritje e kapaciteteve hotelerike dhe të punësimit, e për pasojë rritje e të ardhurave”
Kryeministri Rama, gjatë fjalës së tij pohoi se BE do të investojë deri në vitin 2020 rreth 12 miliardë Euro në Ballkan dhe Turqi
“BE do të investojnë deri në vitin 2020, 12 miliardë Euro në një zonë të thellë që përfshin Ballkanin dhe Turqinë, që për fat të mirë lidhen me kulturën, me trashëgiminë, lidhen me identitetin europain të gjithë kësaj zone”
Rama gjithashtu bëri edhe një përshkrim të numrit të turistëve në monumentet e kulturës gjatë 2013 dhe gjatë vitit 2016
“ Në Gjirokastër, numri i vizitorëve në kala ka qenë 6900 në vitin 2013, ndërsa në vitin 2016, kalanë e vizituan 46 200 vizitorë. Programi i Rilindjes Urbane e ka nxjerrë Gjirokastrën nga errësira e rrënimit. Në Berat kemi 3600 në 2013 ndërsa në 2016 numri i vizitorëve është 22.500. Në Butrint 60 mijë vizitorë në vitin 2013, ndërsa166 mijë vizitorë vitin e kaluar”, pohoi Rama
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.