Trashëgimia kulturore së shpejti ilustrime në “Virtual Reality” dhe 3D – Hapet tenderi, projekti përfshin 24 objekte në të gjithë vendin

24 objekte të trashëgimisë kulturore, përfshirë muze, kisha, xhami apo objekte të tjera do të ofrojnë së shpejti shërbimin e ekspozimit në formatin 3D dhe VR (Virtual Reality). Agjencia Kombëtare e Shoqërisë së Informacionit (AKSHI) ka hapur procedurat e prokurimit publik për këtë investim, për të cilin është vënë në dispozicion një fond limit prej më shumë se 69.1 milionë lekësh.

Projekti përshin në thelb dixhitalizimin e veprave kulturore dhe ofrimin e informacioneve për çdo vepër arti në objektet e trashëgimisë kulturore kombëtare. Më konkretisht do të ofrohet shërbimi virtual tour 3D dhe VR për ekspozitat në COD dhe në objektet e trashëgimisë kombëtare të përfshira në projekt.

1. Muzeu Historik Kombëtar
2. “Muzeu Kombëtar Etnografik” Krujë
3.  “Muzeu Kombëtar Etnografik” Berat
4. “Muzeu Kombëtar i Fotografisë “Marubi”
5. “Muzeu Kombëtar i Artit Mesjetar” Korçë
6. “Muzeu Arkeologjik” Durrës
7. “Muzeu Kombëtar i Përgjimeve “Shtëpia me gjethe”
8. Banesa “Kadare” Gjirokastër
9. Kisha e Shën Mërisë, Labova e Kryqit, Gjirokastër
10. Kisha e Shën Thanasit, Voskopojë
11. Kisha e Shën Kollit, Voskopojë
12. Kisha e Shën Mërisë, Voskopojë
13. Manastiri i Shën Mërisë, Apoloni
14. Kisha e Shën Thanasit, Karavasta
15. Xhamia Mbret, Berat
16. Xhamia e Beqarëve, Berat
17. Xhamia e Plumbit, Berat
18. Xhamia e Et’hem Beut, Tirane
19. Xhamia e Gjin Aleksit, Rusan/Delvinë
20. Teqeja e Dollmes, Kruje
21. Hamami ne Kalanë e Krujës
22. ArTurbina
23. Teatri Kombëtar i Operas, Baletit dhe Ansamblit Popullor
24. Salla COD

Ndërkohë, pjesë e projekti është edhe ndërtimin e një websit-i i cili do të shërbejë si një portal për veprat e artit i cili do të sigurojë qasje në librarinë e galerive të cilat do të skanohen/fotografohen dhe filmohen në 2D dhe 3D.  Objektet do të shoqërohen edhe më përshkrime në gjuhën shqipe dhe në anglisht, e cila mund të përfshijë më pas edhe shtimin e gjuhëve të tjera.

Ky shërbim pritet të lehtësojë aksesin në objektet e trashëgimisë kulturore si dhe do të shërbejë gjithashtu edhe si një instrument mjaft i rëndësishëm edhe në promovimin e vlerave të tyre.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.