Trazira në tregjet e kapitalit – Teknologjia dhe lufta tregtare thellojnë humbjet për tremujorin

Tregjet e kapitalit kanë vazhduar rënien ndërkohë që lufta tregtare Kinë-SHBA dhe mbikëqyrja rregullatore e disa firmave si Facebook, ka bërë që investitorët të pësojnë humbjen e parë tremujore në bursa në më shumë se 2 vite.

Bursat europiane u hapën në rënie me më shumë se 1% të Mërkurën, ndërkohë që performanca 5-ditore negative ka marrë vrull,  gjë që solli tërheqje ndaj aktiveve të konsideruara si të sigurta.

Bund-i gjerman, që shihet si aktivi më i sigurt i Europës për shkak të vlerësimit prej AAA të financave të Berlinit,  mori nxitje me yield-in 10-vjeçar që preku 0.5% për të parën herë që prej Janarit.

Trazirat në tregjet e aksioneve u thelluan prej sektorit të teknologjisë,  ndërkohë që Nasdaq ka treguar këtë javë performancën më të keqe që prej Qershorit 2016.   Facebook ka humbur më shumë se 70 miliardë dollarë në vlerë tregu që prej skandalit të të dhënave, ndërsa Twitter dhe Google, ranë me 12% dhe 4.5% në sesionin e ditës së Martë.

Humori u përkeqësua edhe prej lajmërimeve se Pekini do të nisë kundërpërgjigjen ndaj tarifave në importe të Shteteve të Bashkuara.

Që prej nivelit rekord të 26 Janarit, tregjet globalë të aksioneve kanë pësuar kryesisht rënie, fillimisht prej shqetësimeve nga tkurrja monetare në ekonomitë kryesore dhe më pas nga mundësia e një lufte tregtare globale.

Indeksi global i MSCI që mat performancën e tregjeve të kapitalit të 47 vendeve, ka rënë me 9% nga niveli rekord i Janarit.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.