Trazira për Apple – Raportohet se kërkesa për iPhone X do të jetë më e ulët

Gjiganti i teknologjisë Apple dhe disa prej furnitorëve aziatik, regjistruan rënie në vlerë tregu, pas një raporti nga e përditshmja ekonomike e Tajvanit, se kërkesa për iPhone X do të bjerë në tremujorin e parë 2018.  Sipas burimeve, Apple pritet të ulë projeksionet për shitjet e iPhone X në 30 milionë njësi, në rënie nga 50 milionë që ishte plani fillestar.

Apple nuk ka shpalosur në mënyrë publike objektivat tremujore për iPhone X, që nisi shitjen në Nëntor me çmimin bazë në $999 në SHBA. Aksionet e Apple kanë patur rritje me 45% këtë vit prej pritshmërive për iPhone X.  Megjithatë, analistët kanë tashmë vlerësime të ndryshme nëse kërkesa për telefonin do të materializohet apo jo.

Në ditën e parë tregtare të kësaj jave, Apple ra me 2.5% në vlerë tregu, në 170.5 dollarë për aksion. Vlerësimet se sa telefona të rinj po prodhon Apple dhe se sa do të shesë,  kane diferenca të mëdha.  Projeksioni më i ulët, tregon për dërgesat e 25 milionë iPhone X, ndërkohë që konsumatorët nuk janë dakord me çmimin e lartë dhe mungesën e inovacionit.  Vlerësimi më i lartë, flet për 40 milionë dërgesa në tremujorin e parë.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.