Tre fusha të reja tenisi në Durrës (FOTOT) – Do të ndërtohen rreth Stadiumit “Niko Dovana”
Bashkia e Durrësit do të ndërtojë një minikompleks tenisi në fushën që rrethon stadiumin “Niko Dovana”. Ky institucion ka hapur të martën garën për realizimin e këtij projekti me një fond limit prej 11,5 milionë lekë. Ofertat do të pranohen deri më 8 Shtator, kohë pas të cilës Bashkia do të përzgjedhë fituesin.
Kompania që do të kontraktohet për ndërtimin e fushave sportive do të ketë një afat prej 60 ditësh nga nënshkrimi i kontratës për të përfunduar punimet plotësisht.
Punimet konsistojnë në ndërtimin e tre fushave të tenisit dhe të një kabine ndërrimi për lojtarët dhe përdoruesit e këtyre fushave. Kompleksi do të jetë i pajisur edhe me prozhektorë, çka do të lejojë shfrytëzimin e terreneve sportive edhe gjatë mbrëmjes.
Në dokumentet e njoftimit të vëna në dispozicion nga Bashkia e Durrësit, krahas projektit të fushave të tenisit, duken edhe dy fusha kalçetoje, të cilat mund të plotësojnë kompleksin sportiv pranë stadiumit, duke e kthyer në një qendër argëtimi për të gjithë qytetarët.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.