Tre skenarët për rekuperimin e aviacionit – Eurocontrol: Në skenarin më të mirë Shqipëria rritet me 3.7%, në skenarin e ulët, 1%
Eurocontrol ka publikuar parashikimin e fundit për rikuperimin e sektorit të aviacionit civil për 6-vjeçarin, pas goditjes së shkaktuar nga COVID-19, teksa merr në konsideratë 3 skenarë të ndryshëm. Pjesë e parashikimeve është edhe Shqipëria, ku sipas Eurocontrol në skenarin e ulët rritja për vitin 2022 do të jetë në masën 19%, në skenarin bazë 40% dhe në skenarin e lartë, 48%. Ndërkaq, sa i takon parashikimit për periudhën 2020-2027, rritja në skenarin e ulët është 1%, në skenarin bazë, 1.9%, ndërsa në skenarin e lartë parashikohet të regjistrohet në 3.7%.
Sipas Eurocontrol, skenari i lartë parashikon që fushata e vaksinimit të vazhdojë si brenda Evropës ashtu edhe në nivel global, me vaksina të besueshme që vazhdojnë të jenë efektive, me një qasje të koordinuar ndërrajonale e ku kufizimet e udhëtimit lehtësohen, me shumicën e flukseve ndërrajonale që rifillojnë nga mesi i vitit 2022. Gjithashtu, udhëtimi i biznesit rimëkëmbet shpejt në këtë skenar.
Skenari bazë është i ngjashëm, por me flukset jashtë Evropës që po rikuperohen më ngadalë (pjesërisht si rezultat i mungesës së një qasjeje të koordinuar ndër-rajonale dhe me udhëtimet e biznesit që po rikuperohen në nivelet e paraCOVID vetëm në vitin 2023. Ndërkaq, skenari i ulët merr në konsideratë ndikimin e disa rreziqeve negative, të tilla si ritmet e ngadalta të vaksinimit, nevoja për vaksina të reja si rezultat i varianteve, rifutja e bllokimit dhe masave të ngjashme, vazhdimi ose rivendosja e kufizimeve të udhëtimit, rreziqet ekonomike., duke përfshirë çmimet e larta të energjisë dhe një rënie afatgjatë të prirjes së njerëzve për të fluturuar.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.