Tregjet aziatike me “dyer të mbyllura” për verërat Made in Kosova

Prodhuesit e mallrave në Kosovë po hasin vështirësi për t’u zgjeruar në tregje të reja për shkak të politikave ndërshtetërore që shpesh bëhen pengesë.

Ky është rasti edhe për prodhuesit e verërave, të cilëve u ndalohet eksporti në tregjet aziatike. Për këtë sektor, ky rajon dhe në veçanti Kina është një mundësi e madhe për të sjellë fitime të mëdha, për shkak të ndryshimeve demografike dhe rritjes së shtresës së mesme.

Por potenciali blerës i këtij vendi, i cili tashmë dominon globalisht për konsumin e verërave, është i mbyllur ndaj Kosovës.

“Është për t’u habitur që edhe më tutje raportet politike mes shteteve përcaktojnë ato ekonomike, që është një dëm i madh në veçanti për prodhuesit e verërave Kosovare në këtë rast për të depërtuar në tregun Kinez dhe përkundër faktit që interesimi i partnerëve Kinez është mjaft i madh për këto produkte që i plotësojnë të gjitha dispozitat dhe standardet e kërkuara për këtë treg. Por politika Kineze ndalon produktet Made in Kosova të vendosen në vitrinat e marketeve”, u shpreh kryetari i Odës Ekonomike të Kosovës, Safet Gërxhaliu gjatë vizitës në një kantinë vere në Rahovec.

Aktualisht, verërat kosovare kanë gjetur tregje vetëm në vendet e rajonit dhe në disa shtete të Bashkimit Europian.

Për sfidat me të cilat përballet ky sektor është shprehur edhe prodhuesi Halim Haxhijaha.

“Janë dy sfida me të cilat ballafaqohemi në eksport, ku e para ka të bëjë me rritjen e akcizës për produktet bujqësore të importuara në tregun e Kroacisë dhe e dyta, që është një hendikep i madh, pamundësia e depërtimit të këtyre verërave në tregun Kinez”, u shpreh ai.

Sipas tij, blerësit potencialë nga Kina kanë kryer analiza të verërave kosovare dhe rezulton se ato karakterizohen nga një cilësi e lartë në prodhim dhe ambalazhim. Haxhijaha i bën apel institucioneve shtetërore që përmes autoritetit të tyre të forcojnë marrëdhëniet diplomatike me këtë vend, për të mundësuar eksportet.

Sa i takon prodhim të verës këtë vit, rendimentet e rrushit kanë qenë më të ulëta për shkak të kushteve klimatike, por cilësia e tij mbetet e lartë.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.