Tregjet e kapitalit dhe paratë e “pista” – Ligji i ri: Heqje licence atyre që s’raportojnë rastet e dyshimta, largim nga puna përgjegjësve
Ligji për tregjet e kapitalit, i sapo hyrë në fuqi, sanksionon masa të ashpra për subjektet apo individët që nuk i përmbahen kritereve për parandalimin e pastrimit të parave. Ndërsa objekt i tij është rregullimi i tregjeve të kapitalit, mënyrës dhe kushteve për ofrimin, blerjen dhe shitjen e instrumenteve financiare në Republikën e Shqipërisë, neni 5 i tij i dedikohet tërësisht detyrimeve që kanë subjektet në luftën kundër pastrimit të parave të pista.
Neni përcakton se të gjithë personat që janë subjekt i këtij ligji, duhet të zbatojnë kërkesat që rrjedhin nga legjislacioni në fuqi për parandalimin e pastrimit të parave dhe financimin e terrorizmit, si dhe aktet nënligjore në zbatim të tij.
Subjektet e licencuara janë të detyruara që, pa njoftim paraprak dhe përfshirje të personave të dyshuar apo të prekur, të njoftojnë menjëherë Drejtorinë e Përgjithshme të Parandalimit të Pastrimit të Parave dhe Autoritetin për çdo rast kur kanë dijeni apo dyshojnë se është kryer, po kryhet apo tentohet të kryhet pastrimi i parave dhe financimi i terrorizmit. Në rast se ekziston një dyshim i arsyeshëm se shkeljet lidhen me pastrimin e parave ose financimin e terrorizmit, Autoriteti i Mbikëqyrjes Financiare i raporton autoritetit përgjegjës në përputhje me legjislacionin në fuqi për parandalimin e pastrimit të parave dhe financimit të terrorizmit.
Në rastet kur Autoriteti vlerëson se subjekti I licencuar ka shkelur detyrimet ligjore mbi parandalimin e pastrimit të parave dhe financimin e terrorizmit, ndaj tij merr një ose disa nga masat e mëposhtme:
- a) urdhëron marrjen e masave për eliminimin e shkeljeve;
- b) pezullon apo heq pjesërisht ose plotësisht licencën;
- c) urdhëron pezullim ose largim nga puna të personave përgjegjës
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.