Tregjet e Rusisë në “kaos” – Rubla dhe aksionet vazhdojnë rënien, prej pritshmërive për sanksione
Tregu i aksioneve të Rusisë ka vazhduar rënien në nisje të javës, duke u vënë nën presion nga perspektiva e sanksioneve të reja amerikane. Indeksi kryesor i titujve të kapitalit në vend (Moex), ka humbur më shumë se 4% të vlerës deri më tani për muajin.
Luhatjet në tregun e Rusisë janë shtuar që kur Washingtoni shënjestroi firma të mëdha ruse dhe disa prej biznesmenëve më të mëdhenj të vendit më datë 6 Prill. Aksionet e gjigantit të aluminit Rusal, ranë me 5% në nisje të tregtisë, pas humbjes prej rreth 30% të vlerës në sesionin tregtar të Hong Kong-ut.
Oleg Deripaska, kreu ekzekutiv i kompanisë, ishte një ndër miliarderët e shënjestruar nga sanksionet amerikane. Sulmi perëndimor në Siri gjatë fundjavës bëri që Presidenti rus Vladimir Putin, të paralajmëroi perëndimin për kaos nëse do të ketë sulme të tjera.
Komentet e Putin vijnë pas raportimeve se Washingtoni pritet të rrisë presionet ndaj Moskës me sanksione te reja ekonomike. Administrata e Trump pritet të ndëshkojë Rusinë për mbështetjen e regjimit të presidentit Bashar al-Assad. Sanksionet e javës së kaluar sollën rënien e madhe të rublës dhe aksioneve të vendit.
Banka Qendrore e Rusisë deklaroi se nuk do të ndërhyjë në tregjet valutorë. Rubla ra me 10% kundër dollarit javën e kaluar, në nivelin më të ulët të 2016-ës, gjë që nxiti spekulimet në tregje se banka qendrore do të blejë valutën për të parandaluar rënien.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.