Tregjet europiane e nisin javën në rritje – Investitorët monitorojnë zhvillimet që kanë të bëjnë me luftën
Bursat europiane e kanë nisur në rritje sesionin e parë të kësaj jave, por investitorët po monitorojnë zhvillimet që kanë të bëjnë me luftën në Ukrainë. Indeksi pan-Europian, Stoxx 600, po qëndron në rritje me rreth 0.6%, ndërsa fitimet më të mëdha i realizon sektori i automjeteve në rritje me 1.4%.
Presidenti i Ukrainës, Volodymyr Zelenskyy, deklaroi se vendi i tij është gati të diskutojë marrjen e statusit të vendit neutral, si pjesë e marrëveshjes së paqes me Rusinë. Ndërkohë, Sekretari amerikan i Shtetit, Antony Blinken, është përpjekur të qartësojë deklaratat e presidentit Joe Boden, i cili tha gjatë turit europian se presidenti rus, Vladimir Putin, nuk mund të qëndrojë në pushtet.
Në tregun e naftës, bençmarkët kryesorë kanë rënë ndjeshëm gjatë sesionit të sotëm, me brentin e Londrës që ka humbur mbi 3% të vlerës dhe tregtohet në rreth 116 dollarë për fuçi. Gjatë ditës së sotme nuk priten të dhëna ekonomike të rëndësishme, por të mërkurën do të publikohet inflacioni në Eurozonë.
Lidion Kulla / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.