Tregjet, në pritje të bankave qendrore – FED parashikohet të rrisë normat e interesit, BQE nuk lëviz
Bursat europiane po ndryshojnë minimalisht edhe në sesionin e sotëm, për shkak se investitorët vijojnë të jenë në pritje të politikave monetare që do të ndjekin Rezerva Federale dhe Banka Qendrore Europiane.
Indeksi pan-Europian, Stoxx 600, është thuajse i pandryshuar krahasuar me mbylljen e sesionit të kaluar. Sektori i teknologjisë është ndër performuesit më të mirë, në rritje me rreth 0.8%, për shkak të lajmeve mbi bashkimin e kompanive të këtij sektorit. Gemalto është rritur ndjeshëm, pasi firma e konsultimit të teknologjisë, Atos, ofroi 4.3 miliardë euro për të blerë këtë kompani.
Prodhuesi më i madh në botë i prodhimit të çipeve për telefona celularë është gjendur nën presion, përgjatë 12 muajve të fundit, por në sesionin e sotëm është rritur me rreth 31%. Për sa i përket aksioneve individuale, kompania Steinhoff ka rikuperuar një pjesë të humbjeve të sesionit të kaluar.
Megjithatë, bankat qendrore janë në fokus të investitorëve, me Rezervën Federale që parashikohet të rrisë sërish normat e interesit, në përfundim të takimit 2-ditor të mërkurën. Ndërsa Banka Qendrore Europiane parashikohet të mbajë të pandryshuar politikën e saj monetare, por do të publikojë parashikimet e reja për rritjen ekonomike në rajon.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.