Tregjet në vrull – Europë, performanca më e mirë në 2 muaj
Tregjet e aksioneve në Europë gjatë së Hënës kanë regjistruar performancën e tyre më të mirë në 2 muaj. Kjo vjen kryesisht si pasojë e ripozicionimit të investitorëve pas kolapsit të aksioneve të kompanive të teknologjisë gjatë javës së kaluar, por edhe si pasojë e fitores së Emmanuel Macron në zgjedhjet parlamentare në Francë.
Edhe aksionet e bankave kryesore të kontinentit të vjetër regjistruan një performancë tejet pozitive gjatë sesionit të parë të javës. Tregu i këmbimit valutor ndërkohë ka qenë i qetë, pavarësisht nisjes së negociatave të Brexit.
Bursa e Parisit u ngjit me 1.1% gjatë së Hënës, për shkak të euforisë së investitorëve. “Ne presim që Macron ta transformojë Francën ashtu si Thatcher kuroi njeriun më të sëmurë të Europës 35 vite më parë, Mbretërinë e Bashkuar”, shprehen ekspertët.
Disa të tjerë madje e krahasojnë me Gjermaninë, duke nënvizuar se Franca mund të ndjekë rastin e Gjermanisë, që 15 vite më parë, ishte një ndër ekonomitë më të dobëta të Europës.
Edhe tregjet aziatike e kanë nisur mbarë këtë javë. Paundi britanik ka fituar lehtë terren, ndërkohë që monedha e përbashkët europiane është zhvlerësuar disi me dollarin, por kryesisht si pasojë e vendimit të Rezervës Federale javën e kaluar. Metali i verdhë ndërkohë ka prekur nivelin më të ulët në thuajse 1 muaj.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.