Stoqet aziatike  u zhytën thellë në territor negativ sesionin e sotëm dhe monedha e përbashkët gjendet në vlerat më të ulëta disa vjeçare kundrejt monedhave kryesore të tregtisë globale. Në Azi investitorët po reagojnë negativisht ndaj kërkesës për ndihmë financiare që rajoni i Valencias ka bërë për qeverinë qendrore në Madrid. Kjo kërkesë në treg përkthehet si një pamundësi e Spanjës, ekonomia e katërt në eurozonë, për të shmangur aplikimin për ndihmë nga financat pan europiane sipas stilit të Greqisë.

Kjo frikë se jo vetëm bankat por e gjithë ekonomia spanjolle do të pasojë Greqinë Portugalinë dhe Irlandën ka mbajtur në nivel të lartë kërkesën për bonot e thesarit amerikan që konsiderohen si “parajsë sigurie”. Në tregun e lëndëve të para, ky ambient me pritshmëri negative ka rrëzuar me 1 dollarë çmimin e naftës ndërsa thatësira në shtetet e bashkuara ka mbajtur në pikën më të lartë historike çmimin e misrit dhe të sojës. Indeksi MSCI për Azinë e paqësorit pa Japoninë ra 2%, ndërsa në Japoni bençmarku Nikkei ra 1.41%.

Në Korenë e jugut KOSPI ra 1.82%. Në Australi ASX ra 1.54%. Në Hong Kong treguesi HANG SENG ra 2.53%, Në Kinë SSEC ra 1.30% dhe në Tajvan TAIEX ra 1.90%. Në tregun monetar euro vlerësohet në 1.2114 dollarë, ndërsa monedha amerikane në 78.15 jen. Në tregun e metaleve të çmuara ari vlerësohet në 1 mijë e 578 dollarë për onz. Në tregun energjetik nafta bruto amerikane për shtatorin vlerësohet në 90 dollarë për fuçi.

Përgatiti: E.Ngjelina

Postoje këtë artikull në: