Bursat aziatike shënuan rënië në sesionin e sotëm, ndërsa euro dhe lëndët e para u drejtuar në rritje, pasi investitorët shpresojnë se Banka Qendrore Europiane do të vendosë për një politikë më agresive në takimin e ditës së sotme.

Ndërsa në përfundim të takimit dyditor Rezerva Federale nuk ofroi asgjë të re dhe ndaloi ofrimin e stimujve të rinj. Për këtë arsye, indeksi MSCI për Azinë e Paqësorit pa Japoninë ra me 0.4%, por aksionet në Australi u kthyer në territor pozitiv pas publikimit raportit që tregoi se shitjet me pakicë u rritën fuqishëm në Korrik.

Edhe në Japoni, indeksi Nikkei fitoi lehtë terren, për shkak të jenit të dobët që ndihmon eksportet dhe për shkak të shpresës që Banka Qendrore Europiane do të tregohet më agresive me politikat e saj monetare në takimin e sotëm. Disa investitorë shpresojnë se Banka Qendrore Europiane do të aktivizonë programin e blerjes së bonove të vendve me probleme, për të ndihmuar sidomos Italinë dhe Spanjën në uljen e kostos së huamarrjes.

Edhe monedha e përbashkër europiane, euro fitoi rreth 0.2% të vlerës në raport me dollarin amerikan, duke u këmbyer me 1.2250 dollarë. Në takimin që përfundoi një ditë më parë, Rezerva Federale në SHBA, nuk ofroi stimuj të rinj monetarë. Por ky institucion mbajti dyert e hapura për blerje të tjera të bonove, në të ardhmen për të ndihmuar ekonominë amerikane të rimëkëmbet. Ndërkohë në tregun e metaleve, ari u rrit lehtë  në rreth 1 mijë e 601 dollarë për onz.

Përgatiti: Lidion Kulla

Postoje këtë artikull në: