Stoqet europiane regjistruan rritje në këtë pjesë të parë të sesionit. Rritja është ndikuar nga blerjet e investitorëve të stoqeve difensive. Kjo lëvizje është një sinjal i hapur se në treg lojtarët po parapërgatiten të jenë të mbrojtur karshi një fundjave të trazuar, ku Greqia do të zhvillojë zgjedhjet parlamentare të konsideruara referendum për të ardhmen e vendit në Eurozonë.

Për pasojë rritja aktuale është e kufizuar dhe në vlerë të vogël që karakterizohet nga largimi prej asteteve me risk. Indeksi pan-europian FTSEurofirst u rrit 0.2% në 992.29 pikë duke zgjeruar rritjen 0.7% të një dite më parë. Nervozizmi në treg konfirmohet nga rritja me 1.3% e indeksit të paqëndrueshmërisë Euro STOXX. Analistët cilësojnë këtë situatë si qetësinë përpara furtunës. Performancën më të mirë po e japin stoqet difensive si prodhuesit farmaceutikë, të ushqimeve dhe të pijeve.

Përgatiti: Ermal Ngjelina

Postoje këtë artikull në: