Bursat europiane kanë qëndruar pranë pikës më të lartë 7-javore që prekën në ditën e Premte. Investitorët janë duke kërkuar ekuilibrin midis statistikës së dobësisë së aktivitetit në ekonomitë më të mëdha në Azi si dhe optimizmi që prodhoi samiti i Brukselit në fundjavën e kaluar. Indeksi pan-europian FTSEurofirst 300 u rrit 0.1% në 1 mijë e 22.68 pikë, pasi regjistroi fitimet më të larta ditore në 7 muajt e fundit në ditën ne premte. Blu çipi europian  EURO STOXX 50 ra 0.1% në 2 mijë e 262.01 pikë.

Në fundjavë indeksi menaxherial i Kinës tregoi rënie në 50 pikë për Qershorin duke sugjeruar se vendi është në stanjacion. Në ditën e premte bursat europiane u mbyllën në pikën më të lartë 7-javore dhe blu çipi europian u rrit 5% duke regjistruar edhe rritjen më të madhe në përqindje në 7 muajt e fundit. Në ditën e Premte bursat u rritën duke ecur në gjurmë të rritjes së fuqishme të pozicioneve afatshkurtra të investitorëve shumica e të cilëve nuk kishin parashikuar një mbyllje rezultative të samitit të udhëheqësve europianë.

Por në treg ka ende analistë dhe lojtarë që paralajmërojnë për teprimin e optimizmit. Analistët argumentojnë se deklaratat në përfundim të samitit ishin shumë herë më pozitive krahasuar me detajet që u ofruan për vendimet që u morën. Analistët thonë se marrëveshja e Brukselit ofroi një vizion për të ardhmen, por mungesa e detajeve të cilat janë duke u punuar do të limitojnë rritjen e mëtejshme të monedhës europiane. Ata thonë se marrëveshja ka një ironi të madhe pasi vendet që supozohet se do të financojnë rikapitalizimin janë njëkohësisht dhe vendet që kanë nevojë për kapital. 

Përgatiti: Ermal Ngjelina

Postoje këtë artikull në: