Tregtia botërore, në rimëkëmbje/ OBT: “Performancë e fortë në T3. Pritet ngadalësim në fundvit”
Organizata Botërore e Tregtisë deklaroi se tregtia globale në mallra është rimëkëmbur në tremujorin e tretë nga karantinat e Covid-19, por parashikoi një ngadalësim në fund të vitit. Organizata theksoi se barometri i tregtisë së mallrave është rritur në 100.7 pikë, nga një nivel rekord i ulët prej 84.5 pikë në Gusht, nxitur nga një rritje e porosive të eksporteve.
Treguesi më i madh se 100 tregon rritje sipër trendit. “Të dhënat e fundit sinjalizojnë një rimëkëmbje të fortë të tregtisë në tremujorin e tretë, ndërkohë që masat e karantinës u lehtësuan, por kjo rritje pritet të ngadalësohet në tremujorin e katërt, prej normalizimit të kërkesës dhe përfundimit të rimagazinimeve”- deklaroi Organizata Botërore e Tregtisë.
Perspektiva ndërkohë, qëndron e pasigurt, me valën e dytë të Covid-19 që po sjell rivendosjen e karantinave në Europë dhe Amerikën e Veriut, ç’ka ka sjellë një tjetër raund të mbylljes së bizneseve. Barometri i tregtisë në mallra i organizatës është një bashkim i indekseve. Treguesit e porosive të eksporteve dhe tregtisë së lëndëve të para bujqësore, rezultuan sipër trendit, dërgesat me kontejnerë dhe pajisjet e makinave brenda trendit, ndërsa transporti ajror dhe pajisjet elektronike, poshtë trendit.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.