Tregtia e jashtme, “gropë” edhe në muajin prill! -44 % eksportet ndërsa importet -36,7 %. Ndikimin më të madh e patën tekstilet
Edhe muaji prill ka qenë një muaj nga më të vështirët për tregtinë shqiptare, diktuar edhe nga masat parandaluese në nivel kombëtar dhe global. Referuar të dhënave të tregtisë së jashtme të publikuara nga INSTAT, rezulton se në Prill 2020 eksportet e mallrave arritën vlerën 15 miliardë lekë, duke u ulur me 44,4%, në krahasim me të njëjtën periudhë të një viti më parë dhe me 16,5 %, në krahasim me Mars 2020.
Importet e mallrave arritën vlerën 36 miliardë lekë, duke u ulur me 36,7 %, në krahasim me një vit më parë dhe me 18,3 %, në krahasim me Mars 2020.
Deficiti tregtar i këtij muaji është 21 miliardë lekë, duke u ulur me 29,9 %, krahasuar me Prill 2019 dhe me 19,5 %, në krahasim me Mars 2020.
Çfarë ndikoi në eksporte
Rënia vjetore e eksporteve prej 44,4 %, këtë muaj është ndikuar nga grupet: “Tekstile dhe këpucë” me -20,1 pikë përqindje, “Materiale ndërtimi dhe metale” me -10,5 pikë përqindje, “Minerale, lëndë djegëse, energji elektrike” me -8,4 pikë përqindje.
Çfarë ndikoi në importe
Rënia vjetore e importeve prej 36,7 %, këtë muaj është ndikuar kryesisht nga grupet: “Makineri, pajisje dhe pjesë këmbimi” me -10,3 pikë përqindje, “Tekstile dhe këpucë” me -8,4 pikë përqindje, “Materiale ndërtimi dhe metale” me -6,6 pikë përqindje. Në ndryshimin vjetor të importeve ka ndikuar pozitivisht grupi: “Ushqim, pije, duhan” me +0,8 pikë përqindje.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.