Tregtia e jashtme – Kosova importon dyfish më shumë nga Serbia se Shqipëria

Edhe për muajin qershor të dhënat nga Tregtia e Jashtme në Kosovë tregojnë për një deficit të lartë tregtar prej 23.5 për qind, krahasuar kjo më të njëjtën periudhë të një viti më parë.

“Gjegjësisht në vlerë prej 268.5 milionë Eurosh, krahasuar me deficitin prej 217.4 milionë Eurosh në vitin 2017. Eksporti mbulon importin  me 12.1 për qind.  Eksporti i mallrave në muajin qershor 2018 kishte vlerën 37.1 milionë Euro, ndërsa importi 305.7 milionë Euro, që është një rënie prej (-2.8%) për eksport dhe një rritje prej 19.6 për qind për import, duke krahasuar me periudhën e njëjtë të vitit 2017”, thuhet në raportin e publikuar në ASK.

Nga të dhënat vihet re se Serbia vazhdon të jetë një nga partnerët kryesore tregtar sa i përket importeve. E krahasuar me Shqipërinë, Kosova importon dyfish më shumë me shtetin serb, 12.3 për qind, ndërsa kjo përqindje me Shqipërinë qëndron në 6.7 për qind.

Ndërsa sa i përket eksporteve, Shqipëria dhe Serbia qëndrojnë pothuajse në të njëjtat nivele kundrejt Kosovës.

“Në muajin qershor 2018, eksportet e Kosovës me vendet e CEFTA-s arritën në 17.4 milionë Euro, ose 47.1 për qind të eksporteve të përgjithshme, me një rënie prej (-7.6%). Partnerë kryesorë për eksport nga vendet e CEFTA-s janë: Shqipëria (14.4%), Serbia (13.4%), Maqedonia (11.8%), Mali i Zi (5.2%).

Ndërsa, importet nga vendet e CEFTA-s në muajin qershor 2018, arritën në 80.8 milionë Euro, ose 26.4 për qind të importeve të përgjithshme, me një rritje prej (-12.8%). Vendet me pjesëmarrje më të lartë për import ishin: Serbia (12.3%), Shqipëria (6.7%), Maqedonia (4.8%) dhe B&H (2.1%)”.

Eksportet e Kosovës në vendet e BE-së arritën në 13.3 milionë Euro, ose rreth 35.9 për qind e eksporteve të përgjithshme, me një rritje prej 15.5 për qind, ku partnerë kryesorë janë Sllovenia dhe Gjermania. Importet e Kosovës nga vendet e BE-së ishin rreth 140.2 milionë Euro, ose 45.9 për qind e importeve të përgjithshme, një rritje prej 28.2 për qind, me partnerë kryesorë Gjermaninë dhe Italinë.

Pjesën më të madhe të eksporteve e përbëjnë metalet bazë dhe artikujt prej tyre në vlerën e 27.8 për qind, ndërsa grupet kryesore të importit e përbëjnë makineritë, pajisjet mekanike dhe elektrike, në vlerën e 16 për qind.

E.Z/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.