Tregtia e Shqipërisë “gropë” në mars! Por me disa shtete bëhet përjashtim…
Shqipëria ka njohur thuajse një përgjysmim të shkëmbimeve tregtare gjatë muajit mars. Referuar të dhënave zyrtare të publikuara nga INSTAT, rezulton me shumicën e partnerëve tregtarë, si rrjedhojë e masave parandaluese të pandemisë, janë ulur importet dhe eksportet.
Por ka disa vende që bëjnë përjashtim.
Me Gjermaninë, Shqipëria ka njohur një rritje të eksporteve. Në mars 2019 eksportet ishin 1.1 miliardë lekë kurse këtë mars ato u rritën me 100 milionë lekë duke shkuar në total në 1.2 miliardë.
Edhe me Spanjën, një vend shumë i prekur nga pandemia, Shqipëria ka njohur rritje të eksporteve. Nga 1 miliardë lekë që ishte në marsin e vitit të kaluar, në marsin e këtij viti, eksportet u rritën me 300 milionë lekë duke shkuar në total në 1.3 miliardë lekë.
Vendi i tretë më të cilin Shqipëria ka njohur rritje të eksporteve në muajin mars është Kroacia ku nga 111 milionë lekë që ishte në marsin e vitit të kaluar, shifra u rrit në 142 milionë lekë në marsin e këtij viti.
Po ashtu, edhe më Turqinë ka një rritje të eksporteve nga 127 milionë lekë në 160 milionë lekë. Me Ukrainën nga 41 milionë në 80 milionë lekë dhe me Mbretërinë e Bashkuar nga 59 milionë lekë në 72 milionë.
Importet
E njëjta tendencë rënëse është konstatuar edhe me importet e Shqipërisë. Megjithatë, ka disa shtete që bëjnë përjashtim. Me Rusinë, Ukrainën dhe Zvicrën, Shqipëria ka njohur një rritje të importeve.
Me Rusinë importet nga 842 milionë që ishin në mars 2020 u bënë 1.7 miliardë lekë në marsin e këtij viti. Po ashtu, me Ukrainën nga 125 milionë lekë u bënë 279 milionë lekë.
Ndërkohë, me Zvicrën nga 803 milion lekë u bënë 1 miliardë e 30 milionë lekë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.