Tregtia e varur nga fasonët – Rritet pesha e industrisë dhe e Italisë në eksporte
Të dhënat e fundit të institutit të statistikave për tregtinë e jashtme tregojnë se, varësia e Shqipërisë ndaj fasonëve në drejtim të tregtisë vazhdon të jetë në trendin rritës. Shifrat tregojnë se, për 8 muajt e këtij vitit, kategoria e tekstileve dhe këpucëve, që në vendin tonë përfaqëson ekskluzivisht industrinë fasone, zë 44% të totalit të eksporteve të Shqipërisë.
Kjo normë është e njëjtë me atë të një viti më parë. Në vitin 2015, kjo kategori grupmallrash zinte vetëm 37% të totalit të eksporteve, dhe në vitin 2014 vetëm 34%, çka konfirmon tendencën në rritje.
Por, eksportet shqiptare, jo vetëm që janë të varura nga kjo kategori grupmallrash, por janë të varura edhe ndaj një shteti të caktuar, Italisë. Kjo jo aq për shkak të afërsisë gjeografike, sesa për shkak të prezencës së madhe të investitorëve Italinë në këtë lloj industrie në vendin tonë.
Në muajin Gusht, 74.6% e eksporteve shqiptare në kategorinë e tekstileve dhe këpucëve ishin drejt Italisë. Pra, nga 7.1 miliardë lekë mallra, 5.3 miliardë u eksportuan drejt fqinjëve, të cilët jo rastësisht janë partneri jonë kryesor tregtar. Edhe në këtë drejtim, tendenca gjatë viteve të fundit është e qartë.
Në vitin 2016, tekstilet dhe këpucët zinin vetëm 63% të totalit të eksporteve drejt Italisë, në 2015, 59%, në 2014, 54% dhe në 2013, 52%, për tetëmujorin e parë të këtij viti, kjo normë fiksohet në 64%.
Të dhënat flasin qartë për varësinë e tregtisë ndaj industrisë fasone dhe ndaj Italisë si investitori numër një në këtë industri. Duke pasur parasysh edhe mijëra vendet e punës që kjo industri ka krijuar, atëherë pesha në ekonominë totale merr përmasa edhe më të mëdha.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.