Tregtia globale, rënie rekord në T2, OBT: Barometri i Tregtisë së Mallrave, në nivelin më të ulët që nga viti 2007

Organizata Botërore e Tregtisë deklaroi të mërkurën se Barometri i Tregtisë së Mallrave ka prekur nivelin më të ulët rekord, që sugjeron se tregtia globale regjistroi një rënie historike në tremujorin e dytë të këtij viti, për shkak të pandemisë së koronavirusit.

“Treguesit shtesë sugjerojnë një rimëkëmbje të pjesshme të tregtisë dhe të prodhimit në tremujorin e tretë të këtij viti, por fuqia e çdo rimëkëmbje të tillë mbetet shumë e pasigurtë: një trajektore në formë L-je dhe jo në formë V-je nuk mund të përjashtohet”, njoftoi Organizata Botërore e Tregtisë në faqen e saj në internet. Barometri i Tregtisë së Mallrave rezultoi në 84.5 pikë në tremujorin e dytë, në rënie me 18.6 pikë, krahasuar me të njëjtën periudhë të një viti më parë.

Në periudha normale, ky barometër parashikon trajektoren e tregtisë për disa muaj, por paqëndrueshmëria e shkaktuar nga pandemia e ka ulur ndjeshëm vlerën parashikuese. “Kjo vlerë, që është më e ulëta që nga viti 2007, parashikon një rënie të tregtisë së mallrave me 18.5% në tremujorin e dytë të këtij viti, krahasuar me një njëjtën periudhë të një viti më parë”, shtoi OBT. Më muajin prill, organizata parashikonte se tregtia globale e mallrave do të binte mes 13% dhe 32%, gjatë 2020-ës, për tu ringritur me rreth 24% në vitin 2021. Por, në muajin qershor OBT deklaroi se për shkak të përgjigjeve të shpejta të qeverive ndaj pandemisë, me shumë mundësi skenarët më pesimistë nuk do të ndodhin.

Lidion Kulla / SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.