Tregtia neto në Eurozonë – Sufiçiti bie në 18.9 mld euro për Tetorin, prej rritjes së madhe të importeve
Rritja e madhe e importeve ka reduktuar sufiçitin tregtar në mallra të Eurozonës gjatë Tetorit, krahasuar me të njëjtën periudhë një vit më parë, tregojnë të dhënat e Eurostat.
Sufiçiti arriti në 18.9 miliardë euro në Tetor 2017, nga 19.2 miliardë euro që ishte në të njëjtën periudhë një vit më parë. Importet u rritën me 10.1% me bazë vjetore në një total prej 168.9 miliardë euro, ndërsa eksportet regjistruan rritje me 8.8% në 187.9 miliardë në total.
Sufiçiti tregtar i 19 vendeve të valutës së përbashkët ka qenë në rritje të fortë që prej fundit të krizës së borxhit, duke i dhënë nxitje ekonomisë së Eurozonës.
Gjermania, ekonomia më e madhe e rajonit, regjistron deri më tani sufiçitin më të madh ndaj vendeve jashtë Bashkimit Europian, në 148.1 miliardë euro. Kjo është kritikuar nga Presidenti i Shteteve të Bashkuara, Donald Trump, i cili ka thënë se vendi po përfiton nga euro e zhvlerësuar për t’i dhënë nxitje fabrikave të vendit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.