Tregtia neto në Eurozonë – Suficiti rritet ndjeshëm në Nëntor, nuk e frenon rritja e euros
Suficiti tregtar në 19 vendet e valutës së përbashkët është rritur gjatë Nëntorit, në nivelin më të lartë në 8 muaj. Kjo, sipas Eurostat, erdhi prej rritjes së eksporteve të mallrave, që tejkaloi rritjen e importeve, pavarësisht fuqizimit të euros. Zyra e Statistikave e Bashkimit Europian, publikoi një rritje të suficitit tregtar në mallra të Eurozonës, në 26.3 miliardë euro për Nëntorin, nga €18.9 miliardë që ishte në Tetor.
Kjo shifër ishte më e lartë edhe se suficiti prej 23.8 miliardë i regjistruar në Nëntorin e 2016-ës. Fuqizimi i tregtisë gjatë këtij muaji, që përkon edhe me rritjen e fortë të euros kundër dollarit, e çoi balancën tregtare të bllokut në nivelin më të lartë që prej Marsit. Ky zgjerim erdhi prej rritjes së kërkesës për mallra të Eurozonës nga pjesa tjetër e botës, që tejkaloi rritjen e importeve drejt bllokut.
Eksportet e Eurozonës u rritën në 197.5 miliardë euro në Nëntor, nga 187.8 miliardë që ishte një muaj më parë. Në të njëjtën periudhë, importet u rritën në 171.2 miliardë euro, nga 168.9 mld. Ndër partnerët tregtarë, suficiti është rritur me Shtetet e Bashkuara, në 107.9 miliardë euro për periudhën Janar-Nëntor 2017. Me Kinën, deficiti është tkurrur në 161.9 miliardë euro, nga 163 miliardë që ishte në Janar-Nëntor 2016.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.