Tregtia neto në Japoni – Eksportet rriten me 16.2%, pritet të nxisin ekonominë në T4
Eksportet e Japonisë janë rritur në Nëntor, duke treguar përsëri për një vrull në ekonominë e tretë më të madhe të botës. Megjithatë inflacioni i ulët, një çështje që ka zgjatur prej dekadash në Japoni, qëndron ende poshtë objektivit të Bankës Qendrore prej 2%.
Një kombinim i rritjes së qëndrueshme ekonomike dhe ngadalësimit të çmimeve të konsumit, nënkupton se Banka e Japonisë do të mbetet pas institucioneve të tjera në botë me përfundimin e stimujve monetarë.
Një sondazh i bankës tregoi se pritshmëritë e korporatave për inflacionin u rritën fare pak gjatë Dhjetorit, ndërsa treguesi bazë qëndronte në 0.8%. Të dhënat e Ministrisë së Financave treguan se eksportet u rritën me 16.2% në Nëntor me bazë vjetore, sipër projeksioneve për një rritje me 14.6%.
Kjo erdhi prej dërgesave të mëdha drejt Kinës dhe të gjithë Azisë. Vlera e eksporteve drejt Kinës, që është partneri më i madh tregtar i Japonisë, u rrit me 25.1% me bazë vjetore gjatë Nëntorit, në 12.2 miliardë dollarë.
Kjo është vlera më e madhe mujore në historik dhe është nxitur nga pajisjet elektronike. Dërgesat drejt Azisë, që përbëjnë gjysmën e eksporteve të Japonisë, u rritën me 20.4% në Nëntor.
Me Shtetet e Bashkuara, eksportet janë rritur me 13%, kryesisht prej dërgesave të automjeteve. Ekonomistët presin që tregtia neto të kontribuojë në rritjen ekonomike për tremujorin e fundit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.